Padayon ang ginapatigayon nga imbestigasyon kag pagtipon sang mga impormasyon sang mga kapulisan sang Mambusao Municipal Police Station matapos ang ginapahayag shooting incident sa Sitio Bugo, Barangay Bating, Mambusao, Capiz.
Ang biktima amo si alyas ‘Joe’ kag yara sa legal nga pang-edaron.
Sa interview sang Bombo Radyo kay Police Major Ruby Magallanes, Officer-in-Charge sang Mambusao Municipal Police Station, iya ginpahayag nga natabo ang amo nga insidente matapos ang ‘drinking session’ sang biktima upod ang iya kapamilyahan sa amo nga lugar.
Suno kay Magallanes, may nabaton sila nga mga impormasyon natuhoy sa rason sang amo nga insidente sa diin ginasiling nga tuga ini sang personal nga kaakig ukon may posibilidad nga may kaaway ang biktima.
Narekober naman ang mga empty shell sang isa ka armas-luthang nga ginapatihan 5.56mm caliber.
Maduduman nga ang biktima nag-angkon sang nagkalain-lain nga pilas sa lawas matapos ang amo nga insidente kag sa subong yara na sa estable nga kondisyon samtang nagapabilin sa isa ka ospital sa Roxas City.
Nagpasalig naman ang natungdan nga indi mag-untat ang ila nga talatapan agud mahatagan sang nagakaigo nga aksyon ang amo nga insidente.
Interviewed by Bombo Sunnie Mae Constantino Batencila | via Bombo Reports Afternoon Edition
