ROXAS CITY – Wala nagtambong ang mga katapo sang Roxas Memorial Provincial Hospital sa ikaduha nga adlaw sang legislative inquiry in aid of legislation nga ginpatawag sang Sangguniang Panlalawigan subong nga adlaw.
Mahibaluan nga ang nasambit nga inquiry ang may kahilabtanan sa natabo nga pagkamatay sang apat ka mga pasyente sa sulod sang Intensive Care Unit (ICU) sang nasambit nga ospital.
Mahibaluan nga sa ikaduha nga adlaw sang inquiry ginpadal-an sang provincial board sang imbitasyon ang mga opisyales sang ospital nga ginalakipan sang chief of hospital, head nurse, maintenance division kag iban pa agud magpaathag sang ila bahin natuhoy sa nasambit nga insidente.
Apang wala nagtambong ang mga ini bangud ginapahayag nga may ginapatigayon naman sila nga ila kaugalingon nga imbestigasyon.
Mahibaluan nga una na nga nagtambong ang pamilya sang napatay nga mga pasyente sa una nga adlaw sang inquiry.
Una naman nga ginklaro sang provincial board nga ang amo nga inquiry ang may katuyuan nga mapasangkad pa ang serbisyo sang ospital kag indi agud magpangita sang balasulon sa nasambit nga insidente.
