ROXAS CITY, CAPIZ- Preparado na ang mga katapo sang Roxas Component City Police Station para sa pagmintinar sang kalinong kag katawhay sang palibot sa tion sang Simbang Gabi.
Sa interview sang Bombo Radyo kay Police Chief Master Sergeant Ramil Arcangeles, Spokesperson sang Roxas Component City Police Station, iya ginpahayag nga magapahamtang sa duha ka pulis kada mission churches sa syudad sang Roxas.
Suno kay Arcangeles, magabulig man sa pagbantay sa seguridad ang mga katapo sang Task Force Multipliers kag mga tanod sang tagsa ka mga barangay.
Pahayag niya, 24 oras ang presensya sang mga pulis sa nagkalasambit nga mga simbahan agud madasig ang pagpangayo sang bulig sang mga nagakinhanglan.
Nagpahanumdom naman ang natungdan sa publiko nga likawan ang pag-post sa social media sang mga laragway sang lugar nga ginakadtuan kun wala pa kapauli sa tagsa ka mga puluy-an agud makalikaw sa kinawatay.
Interviewed by Bombo Jessa Mae Siman De Los Santos
