ROXAS CITY, CAPIZ – Ginselebrar sang mga kauturan nga Muslim sa Capiz ang Eid’l Fitr ukon ang pagtakop sang isa ka bulan nga pagpuasa subong nga adlaw Marso 31, 2025.
Sa interview sang Bombo Radyo kay Mr. Abdul Rahman Ali, pinuno sang Muslim Community sa Capiz, ang Eid’l Fitr ang pista sang pagpalangga sa kapareho nga Muslim kag pila sa mga ginahimo nila bilang pagselebrar amu ang pagkaon kag pagpadulong sa iban nga lugar agud maglagaw.
Dugang pa sini, may mga nakapreparar nga pagkaon pagkatapos sang ila pagpuasa kag madamo sang mga kauturan nga Muslim ang nagpadulong sa ila Mosque sa Premier De Mayo sa tion sang Ramadan kun sa diin nagikan ang iban sa nagkalain-lain nga kabanwahanan diri sa probinsya sang Capiz.
Mahibaluan nga ang pag-anunsyo sang petsa para sa Eid’l Fitr subong nga tuig natabo pagkatapos nga ang crescent moon nakita sang pila ka mga grupo nga gin-organisar sang Bangsamoro Government, PAGASA, kag iban pa nga ginkumpirmar sang mga otoridad upod ang Bangsamoro Grand Mufti Sheikh Abdulrauf Guialani.
Samtang, Abril 1 ang petsa nga gindeklarar sang palasyo nga holiday may kaangtanan sa Eid’l Fitr apang may pila ka mga lugar sa Bangsamoro Autonomous Region in Muslim Mindanao nga nagdeklarar sang non-working holiday subong nga Mraso 31.
