Ginalauman nga magatambong ang pila ka mga mataas nga opisyal sang gobyerno kag iban pa nga mga resource persons sa House Committee on Justice sa nagapadayon nga imbestigasyon sa reklamo sa impeachment batok kay Vice President Sara Duterte buwas ng adlaw.
Suno kay Justice Committee Chairperson kag Batangas 2nd District Rep. Gerville Luistro, lakip sa mga gin-imbitar sanday Ombudsman Jesus Crispin Remulla, anay Senator Antonio Trillanes IV, mga opisyales sang Anti-Money Laundering Council (AMLC), kag iban pa agud maklaro ang mga alegasyon batuk sa Bise Presidente.
Tinutuyo sang hearing nga usisaon ang ginaalegar gulpi nga pagtaas sang manggad ni Sara Duterte kag ang isyu sang ginaalegar sala nga deklarasyon sa iya Statements of Assets, Liabilities and Net Worth (SALN), nga posible magdul-ong sa kaso nga “betrayal of public trust.”
Ginalauman nga magapresentar si Remulla sang mga kopya sang SALN sang Bise Presidente gikan sa nagkalain-lain nga tinuig, samtang magatestigo naman si Trillanes angut sa iya nauna nga mga alegasyon angut sa ginpahayag tinago nga manggad ni VP Sara kag sang iya amay nga si anay Presidente Rodrigo Duterte.
Gina-imbitar man ang suspendido nga Overall Deputy Ombudsman Melchor Carandang, subong man ang mga opisyales sang AMLC agud ipresentar ang ginaalegar makaduluda nga transaksyon sa bangko nanday Sara Duterte kag bana sini nga si Atty. Manases Carpio.
Ginalauman man nga magatambong ang isa ka opisyal sang Bureau of Internal Revenue (BIR) agud maghatag sang impormasyon angut sa income tax returns sang mag-asawa.
Ginhatagan pagtamod ni Luistro nga katuyuan sang nasambit nga hearing nga hibaluon kun bala may bastante nga “probable cause” agud mapaabante ang kaso nga impeachment batuk kay Bise Presidente Duterte.
