ROXAS CITY – Nagdagsa ang pila ka mga manugkumpra sang isda gikan sa Iloilo sa Libas fishing port sa Barangay Libas, Roxas City agud magpamakal sang isda kasunod sang pagdeklarar ni Iloilo City Mayor Jerry Treñas sang lockdown sa Iloilo fishing port bangud sa pagduging sang coronavirus disease (COVID-19).
Ini ang ginpahayag ni Nereus Leo Azarcon, administrador sang nasambit nga port sang mainterview sang Bombo Radyo.
Bangud diri, hugot nga gina-implementar ang strikto nga mga pagsulundan para sa mga nagaabot sa amo nga lugar.
Kabulig sang mga opisyales sang barangay ang mga katapo sang Roxas City Police Station, Capiz Provincial Mobile Force Company, Roxas City Environmental and Sanitation Enforcement Team (RESET) kag iban p
Suno naman kay Rhoda Ortega, staff sa nasambit nga port, hugot nga ginasunod ang pagsuksok sang face mask kag physical distancing sa nasambit nga lugar.
May thermal gun scanning nga ginapatigayon, paglista sang pangalan, kag iban pa nga impormasyon sa mga nagasulod sa port.
Gina-usisa man ang mga ini kun diin sila naghalin kag ano ang ila ginsakyan padulong sa siyudad sang Roxas.
Suno diri nga kaina sang aga, kapin 42 ka mga kumprador ang nag-abot sa port gikan sa Iloilo.
Suno naman sa kolektor sa nasambit nga port nga si Ronnie Miranda nga ang iban sa mga kumprador ang madugay na nga nagakuha sang isda sa nasambit nga pantalan.
May pipila lamang suno diri nga bag-o sa ila panulukan apang nagaagi man sa maid-id nga proseso antes pasudlon sa port.
