ROXAS CITY – Aminado ang chairman sang Committee on Transportation and Public Utilities sa Sangguniang Panlalawigan nga tuman nga maapektuhan ang probinsiya sang Capiz sa ginpapanaog nga Memorandum Circular No. 036-2020 sang Department of Interior and Local Government (DILG) nga nagadumili sa mga tricycle sa mga national roads.
Ini ang ginpahayag ni Board Member Jonathan Sonny Besa sang mainterview sang Bombo Radyo.
Suno kay Besa nga gina-implementar lamang sang DILG ang naga-eksister na nga laye bangud sa iya pagkahibalo may yara naman sang isa ka Presidential Decree nga nagamandu sang amo nga pagsulundan.
Apang aminado ini nga mangin dako nga problema para sa probinsiya sang Capiz ang nasambit nga pagsulundan ilabi pa nga ang mga tricycles ang nagapanguna nga ‘mode of transportation’ sa probinsiya.
Suno diri nga mahimo nga may magdangop sa DILG kag hinyuon nga indi pag-ilakip ang probinsiya sa amo nga pagsulundan.
Apang sa karon suno sa iya, kinahanglan sundon sang mga Local Government Units (LGUs) ang ginamandu sang laye nga magdihon sila sang bag-o nga traffic route plan agud gilayon naman nga maka-apply ang mga luyag makaangkon sang prangkisa gikan sa Land Transportation Franchising and Regulatory Board (LTFRB).
