ROXAS CITY – Ginklaro sang pamunuan sang Department of Social Welfare and Development (DSWD) Regional Office 6 nga tubtob lamang Mayo 4 ang ginhatag nga plaso sa mga local government units (LGU’s) para sa distribusyon sang ayuda sa mga Social Amelioration Program (SAP) beneficiaries.
Ini ang ginpahayag ni DSWD Regional Director Evelyn Macapobre sang mainterview sang Bombo Radyo.
Suno kay Macapobre nga una nga gin-extend ang distribusyon sang nasambit nga ayuda sa mga benepisyaryo sang tubtob Mayo 1 apang may mga LGU’s sa gihapon nga wala makatapos gani ginpalawig pa gid ini tubtob Mayo 4.
Pananglitan suno diri nga indi sa gihapon matapos sang isa ka LGU ang distribusyon sang ayuda sa gintalana nga plaso, dapat ini nga magpaathag sa ahensiya kun ngaman napaslawan ini nga matapos ang pagpanghatag sang nasambit nga ayuda.
Ginpahayag ni Macapobre nga sa 17 tanan ka mga LGU’s sa Capiz nga nagabug-os sang 16 ka mga kabanwahanan kag ang siyudad sang Roxas, 12 na ang nakatapos sa ila nga distribusyon sang nasambit nga ayuda.
Nagalaum si Macapobre nga matigayon man nga matapos sang 5 ka iban pa ang pagpanghatag sang nasambit nga ayuda sa mga benepisyaryo.
Kinahanglan na ini nga sakuon suno sa opisyal bangud magahikot naman sila sang para sa ikaduha nga hugna sang nasambit nga ayuda para sa bulan sang Mayo.
Samtang ginaganyat sang mga opisyal ang sinuman nga persona nga luyag magreklamo nga magpadala sang sulat sa ila talatapan kun may nakit-an sila nga iregularidad sa pagtumod sang ila barangay officials sa mga SAP beneficiaries.
