Nagpanawagan ang mga lider sang Association of Southeast Asian Nations nga untaton na ang giyera sa Middle East kasunod sang nagataas nga tensyon sa tunga sang US, Israel, Iran, kag Hezbollah.
Sa ginpatigayon nga press conference pagkatapos sang ika-48 nga ASEAN Summit, ginpahayag ni President Ferdinand Marcos Jr. nga mabudlay pangitaon ang mapinadayunon nga solusyon samtang nagapadayon ang pagpamomba kag inaway sa rehiyon.
Kadungan sini, nagapanawagan man ang mga foreign ministers sang ASEAN sa tanan nga bahin nga untatan ang kalakasan, sundon ang ceasefire, kag likawan ang ano man nga tikang nga mahimo magpalala sang sitwasyon.
Ginhatagan man importansya sang ASEAN ang Strait of Hormuz nga ipabilin nga bukas kag luwas, nga ginakabig nga importante nga alagyan sang mga barko nga nagadala sang langis kag iban pa nga mga produkto sa bug-os nga kalibutan.
Ginpahanumdom man ni President Marcos nga ang nagapadayon nga tensyon mahimo nga mangin kabangdanan sang pagka-delay sa pagbiyahe sang mga barko kag eroplano, subong man sa pagpadala sang mga importante nga produkto sa nagkalain-lain nga pungsod.
