Magahiwat ang mga lider sang Simbahan Katoliko, iban pa nga religious groups, kag civil society organizations sang anibag-o nga “White Ribbon Movement March” sa Hunyo 28 bilang pagpadayon sang Trillion Peso March batuk sa korapsyon.
Suno kay Bishop Colin Bagaforo, lead convenor sang Catholic Bishops’ Conference of the Philippines (CBCP) Inter-Religious Leaders’ Council for National Transformation kag obispo sang Kidapawan ang nasambit nga aksyon ang nakabase sa pagtuo kag nakasentro sa pagpangamuyo, pagpamalandong, kag kolektibo nga responsibilidad sang mga pumuluyo para sa maayo nga pagdumalahan.
Ang prostesta pagahiwaton sa People Power Monument kag ginalauman nga magasugod pasado sa udto, nga may partisipasyon gikan sa nagkalain-lain nga sektor halin sa simbahan, NGOs, kag civil society.
Tinutuyo sang nasambit nga aksyon ang pagpanawagan sang accountability sang mga involved sa korapsyon, subong man ang pagpasanyog sang tampad kag makatarunganon nga panggobyerno para sa mga Pilipino.
Ang grupo magaduso man sang pagpatuman sang kasuguan batok sa mga political dynasty kag paghiliusa agud matigayon ang pagbag-o sa sistema sang pagdumala sang pungsod.
