ROXAS CITY – Nagapanawagan ang sektor sang transportasyon kag pila ka mamumugon sang oil price freeze kag pagbasura sang oil deregulation law kadungan sang pagsaulog sang labor day.
Sa pakig-angut sang Bombo Radyo kay Ian de Pedro, tricycle driver kag miyembro sang Piston Panay, suno diri mabudlay ang pangabuhian ilabi na subong nga pandemya kag sa asod-asod nga pagtaas sang presyo sang gatong.
Suno diri, nga indi bastante ang kita sang isa ka tricycle driver bangud sa pagtaas sang presyo sang gatong kag pagtaas man sang nagapanguna nga balaklon.
Nangapangabay man ini nga mahatagan sang igtalupangod sang gobyerno nasyunal ang mga driver kag iban nga mga mamumugon sang long-term nga programa nga maka-benepisyo man ang yara sa nasambit nga sektor kag mahatagan sang dugang nga pangabuhian.
Samtang, ginaduso naman sang coordinator sang Makabayan Panay nga si Crimson Labinghisa ang bastante nga trabaho, benepisyo kag nagakaigo nga sweldo ukon P750 minimum wage.
Gintuad ni Labinghisa nga wala ginahatagan sang prayoridad sang gobyerno ang kinamatarong sang mamumugon ilabi na sang sumugod ang administrasyon ni Duterte.
Dismayado man ini, bangud suno diri napaslawan si Presidente Duterte sa iya mga ginpromisa nga igatib-ong ang kinamatarong sang mamumugon kag sa baylo ginhimo pa sini nga legal ang contractualization.
