ROXAS CITY – Dismayado ang organisasyon nga Kahublagan sang mga Mangunguma kag Mamumugon sa Capiz (KAMAKA), sa pagtindog ni Ferdinand “Bongbong” Marcos Jr. bilang Presidente sang Pilipinas.
Sa interview sang Bombo Radyo kay Mr. Angelo Orenze tagpamaba sang KAMAKA, ginpahayag sini nga indi sila kontento sa pagdumala ni Marcos ilabi na pag-abot sa sektor sang agrikultura, rason nga 4 lamang ang iskor nga ginhatag sini.
Suno kay Orenze, sumugod nga nagpungko si Marcos bilang Presidente nagsugod naman nga nagtaas ang tanan nga mga balaklon ilabi na ang abono para sa ila mga produkto kun sa diin suno sa iya nga sadto anay yara lamang ini sa P900.00 apang sang mangin Presidente na si Marcos gulpi ini nga nagtaas sang P3,000.00.
Pangabay sini, nga kun tani mangin patas lang ang tanan ilabi na pag-abot sa pagbakal sang ila mga produkto kun sa diin ginabakal lamang ini sa manubo nga presyo apang ang ila mga kinahanglanon padayon nga nagataas rason nga indi mabalik ang ila kapital kag nagresulta pa sa pagkalubog sa utang.
Aprubahan naman kun tani sang Presidente ang proyekto nga pagpanghatag sang duta sa mga mangunguma, bangud kadam-an suno kay Orenze nga mga mangunguma naga-uma sa indi nila duta kun sa diin makaluluoy pag-abot sa tubas ilabi na kun piyerdi lamang ini.
Taagan man kun tani sang igtalupangod ni Marcos sila nga mga mangunguma, protektahan kag direkta nga ipalab-ot sa ila ang mga benepisyo nga para sa ila kag indi na pag-ipaagi sa kun sin-o nga mga tarpulano nga may yara sang mataas nga posisyon sa gobyerno.
Mahibaluan nga kaupod sang grupo nga Gabriela magaupod man ang KAMAKA sa pagpatigayon sang rally kadungan sang State of Nation Address (SONA) ni Presidente Marcos.
