Makabaton sang fuel subsidy ang mga mangunguma kag manugpangisda sa Western Visayas suno sa Department of Agriculture Region 6.
Sa interview sang Bombo Radyo kay Maria Teresa Solis, Regional Director for Operations sang Department of Agriculture Region 6, iya ginpahayag nga nagahulat na lang sila sang implementing guidelines sa pagpanagtag sa nasambit nga programa.
Suno kay Solis, magapatigayon man sila sang monitoring agud masiguro ang husto nga mga pangalan sang mga benepisyaryo nga rehistrado sa Registry System for Basic Sectors in Agriculture (RSBA).
Pahayag pa niya, ang mga kwalipikado ang sarang makabaton sang ginabanta P5,000 para sa mga mangunguma kag P3,000 para sa mga manugpangisda.
Dugang pa sang natungdan, nagahimo sang tikang ang ila nga talatapan agud gilayon nga mahatagan sang nagakaigo nga bulig ang mga manugpangisda kag mangunguma sa tunga sang nagapadayon nga pagtaas sang presyo sang gatong.
