ROXAS CITY – Nagpatigayon sang rally ang nagalab-ot sa 30 ka mga mangunguma sa atubang sang kapitolyo probinsiyal sa probinsiya sang Capiz.
Nagpanawagan ang grupo sang Kadamay, Pamanggas kag Kamaca kay Governor Antonio del Rosario nga gilayon hatagan sang hustisya ang pagkamatay sang isa ka mangunguma kag pagkapilas sang apat ka iban pa matapos luthangon sang mga tinawo sang administrador sang Nemesio Tan Land Holdings Inc., nga si Kapitan Ferdinand Bacanto sang Barangay Culilang, President Roxas, Capiz.
Suno kay Manang Lucia sang grupo nga Pamanggas nga indi kumbinsido ang ila nga grupo sa nangin aksyon ni Governor de Rosario sang ipatawag ang grupo sang mga CLOA beneficiaires kag representante sang pamilya Tan.
Nagapati ang grupo nga dapat ihatag na sa mga benepisyaryo ang duta nga 20 ja tuig na nila nga ginahulat.
Nagapanindugan man ang grupo sang mga mangunguma nga dapat mabilanggo man si Kapitan Bacanto nga ginatudlo utok sang nagluntad nga pagtiniruhay.
