CAPIZ – Nalipay ang pila ka mga mangunguma sa probinsya sang Capiz matapos nga nabaton na nila ang ila nga premyo sa ginpatigayon nga Vegetable Production Contest nga programa sang provincial government.
Ini ang ginpahayag ni Provincial Agriculturist Sylvia Dela Cruz sang Office of the Agriculturist sang mainterview sang Bombo Radyo.
Suno kay Dela Cruz nga nagpili ang mga municipal agriculturist sang entries nga gikan sa mga nagkalain-lain nga mga munisipyo sa diin ginapili nila ang “the best of the best” nga munisipalidad sa diin nagapatigayon sila sang ebalwasyon sandig sa ila guidelines.
Mahibaluan nga nagpili sila sang Top 5 Municipality nga makabaton sang premyo.
Kalakip sa Top 3 amo ang banwa sang Dumalag nga nagbaton sang P100,000; Pontevedra nga P70,000 kag Maayon nga P50,000.
Samtang ang 4th prize nagbaton sang P20,000 kag P10,000 naman sa 5th prize.
Magluwas diri, nagbaton man sang consolation prizes nga P3,000 ang mga munisipyo nga wala nalakip sa Top 5.
Dugang pa ni Dela Cruz nga nangin maayo ang resulta sang nasambit nga programa sa diin daku ini nga bulig sa mga mangunguma sa sektor sang agrikultura.
Samtang, natalana naman nga mag-conduct sang post evaluation ang office of the Agriculturist para sa mga grand prize winners.
Nakita man ni Governor Esetaban Evan Nonoy Contreras ang maayo nga resulta sang nasambit nga programa rason nga ginpakamaayo sini nga padayunon.
Matandaan, nga ang Vegetable Production Contest ang ginlusyar ni anay Governor Tony del Rosario sang nakaligad nga administrasyon.
