ROXAS CITY, CAPIZ- Ginasiguro ni Mr. Raoul Perez, Acting Provincial Agriculturist sang Office of the Provincial Agriculturist – Capiz sa mga mangunguma nga naapektuhan sang Bagyo Opong sa probinsya nga makabaton gid sang bulig nagikan sa ila nga talatapan kag sa gobyerno probinsyal.
Sa interview sang Bombo Radyo, iya ginpahayag nga sa subong, may yara palang sang tatlo ka mga kabanwahan ang nagpaa sang report sang mga apektado nga mangunguma kag mga talamnan. Ginakalakipan ini sang mga kabanwahanan sang Panay, Pontevedra kag Dumarao.
Kun sa diin, base sa inisyal nga datos, yara sa 107 ka mga mangunguma ang apektado kag 138 ka ektarya sang uyapad ang partially damaged sa Panay, yara naman sa 42 ka mga mangunguma ang apektado kag 32.5 ka ektarya sang uyapad ang partially damaged sa Pontevedra kag 154 naman ka mga mangunguma ang apektado, 9.25 ka ektarya ang totally damaged kag 138.55 ka ektarya ang partially damaged sa banwa sang Dumarao.
Suno kay Perez, nagapadayon pa sa gihapon ang pagberipika kag pagtipon sang mga datos sang Department of Agriculture kag mga katapo sang Municipal Agriculturist Office agud matumod ang kabilugan nga halin nga ginbilin sa sektor sang agrikultura sa probinsya.
Pahayag pa nya, pamaagi sa insurance, mahimo nga mahatagan sang nagakaigo nga kantidad sa kadakuon sang halit nga ginbilin sa mangunguma ang Philippine Crop Insurance Corporation (PCIC) kun insured ini. Apang, sa mga mangunguma naman nga wala pa ma-insure, mahimo sa gihapon nga makabaton sang bulig nagikan sa gobyreno probinsyal.
Dugang pa sang natungdan, magluwas sa cash incentives, may mga binhi man nga igapanagtag sa mga apektado nga mga mangunguma.
Nagapahanumdom naman si Perez, nga sa gihapon padayon pa ang ila nga pagtipon sang datos agud nga madalayon na nga mahatagan sang bulig ang mga apektado nga mangunguma sa probinsya.
Interviewed by Bombo Francis Biñas
