Nagpabutyag sang pagkabalaka ang mga manugbulang may kaangtan sa hagna nga Senate Bill No. 2975 ukon ang Revised Animal Welfare Act nga gin-isponsoran ni Senador Grace Poe, bangud posible nga malakip ang bulang sa mga aktibidad nga bawalon.
Suno kay Joey Sy, beterano nga gamefowl breeder kag host, mahimo madula ang isa sinang-una nga tradisyon kag palangitan-an sang linibo ka mga Pilipino kun malakip ang bulang sa mga bawalon nga animal fights.
Dugang pa ni Sy nga mahimo madalahig ang bulang kun indi ini pag-athagon. Gin-segundahan ini sang iya co-host nga si Eddie Boy Ochoa nga nagapanawagan nga ideklara ang bulang bilang kabahin sang pungsodnon nga pamana agud indi ini nga pag bawalon.
Samtang, ginhatagan pagtamod ni Atty. Arturo De Castro, isa ka gamefowl breeder kag manugbulang, nga wala sa hagna ang exemption sa bulang, kag posible ini magtuga sang “kiss of death” sa mga politiko nga magsuporta diri.
Madumduman nga sang Hunyo 2, gin-aprubahan sang Senado sa ika-tatlo kag pinal nga pagbasa ang Senate Bill 2975, nga tuyo tapuson ang animal cruelty.
Nauna naman nga gin-aprubahan sang Kamara ang House Bill 11254, nga nagabawal sa online nga bulang.
