Madinalag on nga ginpatigayon sang Department of Education–Schools Division of Capiz ang “Transforming Classroom Practice: Capacity-Building Program on the Effective Implementation of the Revised Grades 6, 9, and 10 Curriculum” sa Circulo Convention Center, Pueblo de Panay Township, Lawaan, Roxas City.
Gintambongan ini sang mga manunudlo halin sa nagkalain-lain nga eskwelahan sa Capiz agud mapabakod pa ang ila ihibalo kag ikasarang sa pagtudlo sang bag-o nga curriculum para sa Grades 6, 9 kag 10.
Kaupod sang amu nga programa ang mga partisipante upod ang mga opisyal sang DepEd nga malipayon nga nagbaton sang Certificate of Participation pagkatapos sang apat ka adlaw nga training.
Suno sa programa, nakompleto sang mga partisipante ang 32 ka oras nga training kag nakakuha sang 15 approved credit units.
Lakip sa mga nagtambong ang mga manunudlo kag trainers halin sa banwa sang President Roxas, nga nangin aktibo man nga mga partisipante sa amo nga pagsinapol.
Katuyuan sang capacity-building program nga buligan ang mga manunudlo nga mangin mas preparado kag epektibo sa pagpatuman sang ginbag-o nga cirriculum sang DepEd.
Naka-focus ini sa mga bag-o nga estratehiya sa pagtudlo, assessment kag classroom management nga nagasanto sa mga kinahanglanon sang mga estudyante sa subong nga tion.
Ginapangunahan ang programa sang Schools Division of Capiz sa idalom sang pagpanguna ni Dr. Roel F. Bermejo, Schools Division Superintendent.
Ginapaabot nga ang mga natun-an sa training ipabalo kag ipatuman sang mga manunudlo sa ila tagsa-tagsa ka eskwelahan agud mapauswag pa ang kalidad sang edukasyon sa Capiz.
