Ginpahayag ni Philippine National Police (PNP) Chief Police General Nicolas Torre III nga ang mga overweight ukon matambok nga pulis mahimo makakas sa serbisyo kun indi sila magpaniwang pagkatapos sang isa ka tuig.
Base sa Seksyon 30 sang Republic Act No. 6975, nga kilala man nga Department of the Interior and Local Government Act sang 1990, ginpahayag ni Torre nga ang isa sa mga kwalipikasyon bilang opisyal ukon miyembro sang PNP amo ang dapat magbug-at nga more or less than 5 kilograms sang standard nga bug-at nga angay sa ila taas, edad, kag sekswalidad.
Ginpaathag ni Torre nga suno sa regulasyon sang PNP, ang mga pulis nga indi angay ang timbang, hatagan sang anom ka bulan tubtob isa ka tuig agud ma-normalize ang ila timbang.
Apang kun pagkatapos sang isa ka tuig nga wala pa gihapon nagbuhin ang timbang, mahimo sila nga makakas sa serbisyo.
Para sa mga pulis nga may mga medical condition, mahimo sila nga magapangatubang sa “complete disability discharge” ukon isaylo sa administrative work.
Si Torre, nga bag-o lang nagpungko bilang PNP chief sini nga bulan, nag-order sa mga pulis nga mag-maintain sang ila physical fitness, bangud maka-apekto ini sa ila promosyon.
Ginpahayag man sang PNP nga ini nga inisyatibo nagapakita sang disiplina sang mga pulis sa publiko.
