ROXAS CITY – Ginkaakig kag wala mauyunan sang mga miyembro sang Sangguniang Panlalawigan ang nagatuhaw nga istorya nga may gina-demand sila sa Executive Department sang gobyerno-probinsiyal rason nga wala pa maaprubahan ang Annual Investment Program (AIP) para sa tuig 2020.
Naghatag sang ila tagsa ka mga pahayag ang mga Board Members kun sa diin kadamuan sa ila ang naghambal nga ‘unfair’ ukon indi sang patas nga patu-patuan sila sang kasubong nga istorya.
Ginpanindugan sang mga ini nga ang matuod-tuod nga rason sang wala pag-aprubar sang AIP amo bangud nakitaan nila ini sang ‘discrepancy’.
Suno kay Board Member Jonathan Sonny Besa, wala sang kamatuoran ang nasambit nga mga alegasyon.
Ginpahayag sini nga kun makadihon na siya sang iya nga committee report, diri kag iya mapresentar sang husto ang matuod-tuod nga rason sang wala pag-aprubar sang AIP.
Ginkasubo naman ni Board Member Thea Faith Reyes ang nasambit nga isyu kag gintawag nga ‘very foul’ ang nasambit nga mga alegasyon.
Suno sa iya nga wala sila sang may ginapangayo ukon ginaipit bangud ginahimo lamang nila sang husto ang ila nga trabaho.
Gindugang pa sini nga indi nila luyag nga mabasulan sang mga Capizeño bangud wala nila ginahimo sang ensakto ang ila katungdanan kag sa ulihi pasakaan pa sila sang reklamo sa Office of the Ombudsman.
Samtang, nasakitan man si Board Member Karen Palomar sa ginapatu-pato nga istorya batuk sa ila.
Masakit suno sa iya pamatian ang nasambit nga mga alegasyon batuk sa mga honorable.
Gindugang pa sini nga ang nasambit nga mga alegasyon ang ‘unethical’, ‘unfair’, kag ‘below the belt’.
