CAPIZ – Liwat nga nagapanawagan ang Capiz Police Provincial Office sa publiko nga untatan na ang paggamit sang illegal nga droga kag paghupot sang indi lisensyado nga armas luthang.
Sa interview sang Bombo Radyo kay PCapt. Merry Chris Dela Cruz, Public Information Officer sang Capiz Police Provincial Office, iya ginpahayag nga sa bulan sang Agosto, may yara na sang 12 ka mga indibidwal ang nadakpan bangud sa paglapas sa Republic Act 9165 ukon Comprehensive Dangerous Drugs Act of 2002.
Samtang, walo naman ang arestado bangud sa paglapas sa Republic Act 10591 ukon Comprehensive Firearms and Ammunition Regulation Act.
Suno kay Dela Cruz, 10 ka mga operasyon batuk sa iligal nga droga ang natigayon sa diin 514 grams sang shabu ang nakumpiska.
Pahayag niya, siyam naman ka mga iligal nga armas ang nakumpiska nagikan sa walo ka mga operasyon nga natigayon.
Dugang sang natungdan, dako ang bulig sang mga pumuluyo sa mga operasyon nga ginahimo sang kapulisan bangud sa mga impormasyon nga ginapalab-ot may kaangtanan sa mga illegal activities sa probinsya.
