ROXAS CITY, CAPIZ- Ginpakigbahin sang mga kapulisan sang probinsya sang Capiz ang pila ka mga pagsulundan sa pagbaligya sang mga palupok kadungan sang nagahilapit nga holiday season.
Sa interview sang Bombo Radyo kay Police Lieutenant Colonel Francisco D. Paguia, Deputy Provincial Director for Operations sang Capiz Police Provincial Office, iya ginpahayag nga kinahanglan nga magkuha sang nagakaigo nga mga dokumento kag permit ang mga negosyante sa probinsya nga magabaligya sang mga palupok ukon firecrackers.
Suno kay Paguia, para naman sa mga negosyante nga magabaligya sang mga palupok nga wala sang mga dokumento, ila sini pagakumpiskaron ang mga palupok nga ginabligya kag pamatbatan sang nagakaigo nga penalidan.
Pahayag niya, agud nga indi mapatbatan sang mga penalidad, magsunod sa ila nga mga panugyan kag pagsulundan nga ginapatuman.
Nagpanugyan naman ang natungdan nga kun mahimo, magbaligya lamang sang mga palupok nga sulod sa ila nga listahan kag likawan ang pagbaligya sang mga ginadumilian nga sahi agud makalikaw sa kun ano man nga insidente ang posible nga magluntad bangud sini.
Reported by Bombo Sunnie Mae Constantino Batencila
