ROXAS CITY – Mahimo nga dakpon sang mga otoridad ang sinuman nga miyembro sang Kabus Padatuon ukon KAPA Community Ministry International nga nagapatigayon sang orientation sa probinsiya sang Capiz.
Ini ang ginpahayag sang isa ka kilala nga Capizeño lawyer nga si Atty. Nelson Borja sang mainterview sang Bombo Radyo Roxas.
Suno kay Borja, kasunod sang mandatu ni Presidente Rodrigo Duterte nga pagpasarado sa nasambit nga investment group kag ang paglapas sini sa Securities Regulation Code, nagapatimaan lamang nga ilegal na ang ila nga operasyon.
Mahimo suno sa iya nga magserbi nga state witness ang mismo nga investors batuk sa nasambit nga investment group.
Ginpahayag pa sini nga ginlaragway sang president nga ‘too good to be true’ ang nasambit nga grupo bangud katilingalahan kun sa diin ini nagakuha sang 30 porsyento nga interes sa ginahatag nga kwarta sa ila mga miyembro.
Apang suno kay Borja, mas mabug-at kuntani nga kaso ang mahimo mapasaka sa mga opisyal nga nagabug-os sa nasambit nga grupo kun may investors nga magaserbi complainant bangud mahimo sila pasakaan sang kaso nga Syndicated Estafa.
Kun wala suno sa iya sang complainant, mahimo naman pasakaan sang kaso sang mismo Securities and Exchange Commission (SEC) ang nasambit nga grupo bangud sa paglapas sa Securities Regulation Code.
