ROXAS CITY – Indi na kinahanglan pakabudlayan pa ang mga pumuluyo nga naga-istar sa Housing Unit sa Panayville banwa sang Panay.
Ini ang nangin pahayag ni Board Member Jonathan “Sonny” Besa, sang mainterview sang Bombo Radyo.
Suno kay Besa, isa sa tinutuyo sang lokal nga gobyerno nga mahatagan sang maayo kag komportable nga puluy-an ang mga tawo ilabi na ang mga wala sang kaugalingon nga balay, gani kinahanglan suno diri nga indi na sila pagpakabudlayan pa.
Ini matapos nga may pila na ka mga residente sang amu nga housing unit ang nagpalab-ot sa iya sang reklamo angut sa indi pagtakod sa ila sang tubig kag kuryente sa ila tagsa ka mga unit.
Mahibaluan nga makapila na ka beses nga nagpadulong ang pila ka mga residente sa talatapan sang Capiz Electric Cooperative (Capelco) agud kun tani magpatakod sang kuryente apang, ginapangayuan ang mga ini sang certificate of award nga nagikan sa ila munisipyo nga nagapatuod sila ang nga tag-iya sang amu nga housing unit, subong man sang electrical fire permit nagikan sa BFP sa ila banwa.
Bangud sini, nagpakighinun-anon si Besa sa Capelco kag MRWD agud i-eksplekar nga indi na kinahanglan sang mga aplikante ang sertipakasyon nga nagikan sa LGU Panay, bangud bastante na nga pamatuod nga sila ang nagapanag-iya sang unit nga suportado sang dokumento.
