ROXAS CITY – Nakapasa kag kwalipikado sa pagsulundan sang Department of Social Welfare and Development (DSWD) ang mga benepisaryo nga nagbaton sang tig-P3,000 nga financial assistance sa idalum sang Ayuda para sa Kapos ang Kita Program (AKAP).
Ini ang gin-athag ni Governor Fredenil Castro bilang kabahin sang iya mensahe sa ginhiwat nga distribusyon sang ayuda sa pagpanguna sang DSWD sa Capiz Gym, Roxas City.
Suno kay Castro, ang tanan nga mga benepisaryo ang nag-agi sa husto nga proseso kag wala sang piniliay nga natabo.
Pahayag pa sini, nga wala sang gahum ang mga alkalde kag mga barangay kapitan nga magpili sang mga benepisaryo bangud may kaugalingon nga pagsulundan ang DSWD may kaangtanan sa pagpanagtag sang ayuda.
Mahibaluan, ang kada banwa ang may yara sang 300 ka mga resipiyente sa diin ini ang mga natumod nga apektado sang inflation ukon ang nagakita nga manubo pa sa minimum wage.
Nagapati ang gobernador nga pinaagi sa nasambit nga programa, nakabulig ini sa mga benepisaryo nga mapiyan-piyan ang ila kabudlay nga ilabi na sa pagtinaas sa presyo sang mga balaklon.
