ROXAS CITY – Mahimo na nga makapungko ang mga nagdaug sa pagka-Punong Barangay kag Barangay Kagawad, apang kinahanglan nila una nga maka-oath taking kag maproklamar antes nga makapungko sa pwesto.
Sa interview sang Bombo Radyo kay Mr. Gino Salamanca City Local Officer sang Depertment of Interior and Local Government (DILG) Roxas, ginpahayag sini nga para sa mga bag-o pungko nga opisyales kinahanglan nga magpaidalum sila sang training seminar kung sa diin tinutuyo sini agud ipahibalo kag ipa-intindi ang mga obligasyon kag responsibilidad sa ila barangay.
Suno kay Salamanca, sa iya pagpatawag sang paghinun-anon sa 47 tanan ka mga barangay officials diri nahinalaan ang ila pagpungko sa ila pwesto kung sa diin ginpahibalo sini nga sa tion na-comply na nila ang duha ka mga ginapangayo sang ahensya mahimo na sila mga makasugod sang ila responsibilidad sa ila baranggay.
Sa nasambit nga paghinun-anon nakasugtanan sang mga ini nga dululungan sila nga magapungko ang tanan nga Punong Barangay sa Nobyembre 10, 2023 .
Sarang naman nga makabaton sang singkwenta porsyento sang ila honoraria ang mga outgoing nga opisyal sang baranggay yanda nga bulan sang Nobyembre.
Samtang ginklaro man sini nga indi kalakip sa mga resekitos ang resulta sang drug test antes makapungko sa pwesto ang isa ka elected barangay official.
