Mga nagkaladakpan nga naglapas sa ordinance no.082 sa probinsya nagdangat sa 1,050

ROXAS CITY – Nagdangat sa 1,050 nga mga persona ang nagkaladakpan nga wala nagsuksok sang facemask kag naga-obserbar sang social distancing sa pampubliko nga lugar sa bug-os nga probinsya sang Capiz sumugod sang Hulyo 12.

Sa interview sang Bombo Radyo kay PMaj. Ruby Magallanes, Public Information Officer sang Capiz Provincial Police Office suno diri, kadungan sang liwat nga pagbuhi sang Ordinance Number 082 ukon mandatoryo nga pagsuksok sang facemask kag pag-obserbar sang social distancing, natigayon nga madakpan ang nagalapas sini sa 16 ka mga kabanwahan kag sa syudad sang Roxas.

Nagkaladakpan ang mga violators sa public plaza, merkado kag iban pa nga establisyemento.

Suno diri, ginpaandaman na sang mga kapulisan ang mga violator ang nga kun madakpan sa ikaduha ka beses magabayad na ini sang multa ukon penalidad.

Yari ang mangin penalidad sa paglapas sa ordinansa:

1st offense – Reprimand
2nd offense –P1,000 nga multa ukon pagka-preso sang tatlo (3) ka adlaw
3rd offense – P2,000 nga multa ukon pagka-preso sang napulo (10) ka adlaw

Ginklaro man ni Magallanes nga indi sa kapulisan makadto ang kuwarta nga igabayad sang mga violators kundi naga-isyu lamang sila sang tiket kag pagabayaran ini sa Treasurer’s Office sang munisipalidad.

Nag-apelar man ini sa publiko nga magsunod sa ginapatuman nga ordinansa agud malikawan ang liwat nga pagtaas sang kaso sang COVID-19 kag mahalungan ang aton ikaayong lawas.