ROXAS CITY – Dakup sa akto ang apat ka mga persona nga nagapatigayon sang illegal quarry sa Barangay Pangabuan, Jamindan, Capiz, kagab-i sang Huwebes.
Pinaagi ini sa special joint operation sang National Bureau of Investigation (NBI) kag CaPENRO.
Sa interview sang Bombo Radyo kay Mr. Aries Bañares, Team leader sang Special Investigation sang NBI Regional Office, wala makapakita sang permit ang operator nga ginhingadlan sini kay Manuel Erwin Jinon.
Magluwas kay Jinon, nadakpan man ang duha ka driver sang dump truck kag 1 nila ka assistant samtang nakapalagyo ang driver sang backhoe.
Magapangatubang sang kaso nga paglapas sa Section 103 sang RA 7942 ukon Philippine Mining Act of 1995 ang mga nagkaladakpan.
Sa karon, yara sa paghinakup sang Punong Barangay sa lugar ang mga dumptruck kag backhoe, samtang yara sa kustodiya sang Jamindan MPS ang mga nagkaladakpan.
