ROXAS CITY – Indi matuod nga tuman nga na-apektuhan sang nagtupa nga Bagyong Paeng ang pila ka mga residente nga nagpalab-ot sang ila reklamo, matapos nga wala madala sa listahan sang ginpanagtag nga emergency cash assistance.
Ini ang nangin pahayag ni Punong Barangay Marisol Baria sang Barangay Bunga, banwa sang Panay sang mainterview sang Bombo Radyo.
Suno kay Baria, wala sila sang kakulangan bangud matapos ang bagyo kag pagbaha sa ila lugar ginmanduan sini ang iya mga opisyales nga magpadulong sa tagsa ka mga puluy-an agud ilista ang mga puluy-an nga makabig partially kag totally damage, mga nag-evacuate sa buluthuan, simbahan ukon mga pribado nga puluy-an.
Ini ang ba-se man sa mandato sang Department of Social and Welfare Development (DSWD).
Dugang pa sini nga may yara sang 572 nga household ang amu nga barangay kag kun sa diin 37 diri ang nalakip sa partially kag 1 lamang ang nakabig nga totally damage.
Nahibaluan man niya suno diri nga maga-abot ang adlaw nga may maguha nga kaangay sini nga reklamo, gani bilang pamatuod kadungan sang pagpanglista sang iya mga opisyales, ginmanduan man niya ang mga ini suno diri nga kuhaan sang litrato ang mga residente nga yara sa listahan kag ginpapirma ang iya mga opisyales nga sa pagkamatuod sulod ukon kinahanglan ini nga hatagan sang amu nga assistance.
Apang, dako lang ang iya pagkadismaya suno diri bangud ang mga nagareklamo indi man matuod nga tuman nga na-apektuhan sang baha kag kun kagustuhan lamang niya suno diri ang masunod, luyag niya nga ang tanan nga pumuluyo mahatagan sang amu nga bulig.
Bangud sini, nagahinyo ini sang paghangup sa iya mga residente kag kun tani may yara sila sang mga pamangkot magpadulong lamang sa ila barangay agud mahinalaan kag mahatagan ini sang sabat.
