ROXAS CITY – Nakabaton sang mga sim kag lansang ang mga residente sang Barangay Inzo Arnaldo, Roxas City nga tuman nga naapektuhan sang pagpanglaslas sang bagyo nga Ursula.
Nahibaluan nga 57 tanan ka mga benepisyaryo ang nagbaton sang nasambit nga bulig gikan sa gobyerno sang siyudad.
Talalupangdon nga wala ang presensiya ni Punong Barangay Einstein Okpora sa nasambit nga aktibidad.
Nakit-an lamang sang Bombo Radyo News Team sa amo nga lugar ang apat ka mga barangay kagawad kag ang Sangguniang Kabataan (SK) chairperson sang nasambit nga lugar.
Suno kay Kagawad Romel Balguma, inisyatibo na lamang kuntani ni Okpora nga magpadulong sa distribusyon sang nasambit nga bulig bangud siya ang amay sang barangay.
Apang sa iya pagkaintindi, may yara pa sang personal nga rason si Okpora sa wala pagtambong kag posible may pamulitika sa gihapon ini nga ginapanumdom.
Ginpahayag sini nga naglabay man sa lugar si Okpora apang wala gid ini naghapit.
Aminado naman si Balguma nga indi pagkalasugot nga natabo sa ila sang nagpatigayon sila sang sesyon.
Suno diri nga ginduso ni Okpora sa ila sesyon ang pag-appoint kay Regina Olivare bilang barangay treasurer nga ginpamalabagan sang mga konsehales bangud wala sila sang salig sa amo nga persona bangud naggagamit ini sang ‘double identity’.
Ginpahayag sini nga nagpamalabag sila bangud sadto pa ini ginaduso ni Okpora nga ila naman ginpamalabagan sang una pa lamang.
Ginklaro man sini ang isyu sang pagka-utod sang suplay sang tubig kag kuryente sa amo nga barangay hall.
Suno diri nga sang temporaryo nga gina-appoint bilang barangay treasurer si Elma Borlado sa idalom sang liderato sadto ni 1st Barangay Kagawad Ervin Sicad nga amo ang nagtal-us kay Okpora sang ini ang nasuspinde.
Apang suno diri nga sang nagpungko si Borlado sa amo nga posisyon, may mga ‘arrears’ na ukon balaydan ang barangay sa kuryente kag tubig.
