ROXAS CITY, CAPIZ – Naglab-ot sa kabug-usan nga 26,089 ang nakaparehistro sa probinsya sang Capiz para sa Barangay and Sangguniang Kabataan Elections halin Agosto 1 tubtob Agosto 10, 2025 nga Voter’s Registration, suno sa report sang Office of the Provincial Election Supervisor.
Base sa datos, pinakamadamo nga aplikasyon ang nagikan sa Roxas City nga may kabug-usan nga 4,035 — ginakalakipan ini sang 1,975 nga kalalakinhan kag 2,060 nga kababainhan.
Ginsundan ini sang Sigma (2,458), Panitan (1,877), Mambusao (1,723), kag Maayon (1,580).
Samtang, ang may pinakamanubo nga numero sang nagparehistro amo ang banwa sang Dumalag, nga may kabug-usan nga 684 aplikante lamang.
Halos patas naman ang numero sang ng mga kalalakinhan (13,054) kag kababainhan (13,035) nga nagproseso sang ila nga aplikasyon.
Padayon ang panawagan sang Commission on Elections (COMELEC) sa publiko nga makig-isa kag makigbahin sa proseso sang eleksyon agud masiguro ang isa ka malimpyo kag inklusibo nga piniliay.
