ROXAS CITY – Makaapekto sa mga nangin desisyon ni anay Supreme Court Chief Justice Maria Lourdes Sereno bilang punong mahistrado ang nangin desisyon sang Korte Suprema nga nagabasura sa iya nga motion for reconsideration.
Ini ang ginpahayag sang isa ka Capizeño lawyer nga si Atty Nelson Borja sang mainterview sang Bombo Radyo.
Suno kay Borja, ang quo warranto petition batuk kay Sereno ang nagapamatuod lamang nga indi legal ang pagpahamtang sa iya sa pwesto nga nagapatimaan man nga ‘null and void’ ang iya mga nangin desisyon sa korte suprema bilang punong mahistrado.
Ginpahayag pa ni Borja nga posible nga masundan pa sang kasubong man nga kaso ang natabo kay Sereno sa diin sa simple nga quo warranto petition, mahimo nga mapasipa ang isa ka impeachable official.
Mahibaluan nga sa boto nga 8-6, ginpaboran sang mga mahistrado nga dapat mapabiya si Sereno bilang Chief Justice bangud sa quo warranto petition.
Sa karon suno kay Borja, dapat respetuhon na lamang ang nangin desisyon sang Korte Suprema nga pagbasura sa mosyon ni Sereno nga pagbaliskad sa pagpabor sa quo warranto petition nga ginpasaka batuk sa iya.
