Nagdangat na sa Lima ang patay bangud sa lapnagon nga pagbaha sa Probinsya sang Capiz tuga sang Bagyo Ramil.
Base sa datus sang Provincial Disaster Risk Reduction and Management Office (PDRRMO) , Lima na ang kumpirmado nga napatay sa Capiz bangud sa grabe nga pagbaha: Ini amo sanday Rizaldo Balgos, 44 anyos sang Barangay Dinginan, Roxas City ,Mary Mae Urdelas, 22 anyos sang Barangay Malocloc Sur, Ivisan Capiz, Isa ka lalaki naman ang Nakuryente-patay sa Barangay Dulangan, Pilar Capiz kag Duha pa ka mga indibidwal gikan Roxas City nga gina-verify pa.
Naglab-ot naman sa 17, 418 pamilya ukon katumbas sa 61, 305 ka mga indibidwal ang apektado bangud sa lapnagon nga pagbaha.
Nahibaluan nga Ginpaidalom naman sa State of Calamity ang Syudad sang Roxas.
Bangud sini, suspendido ang klase sa tanan nga lebel sa syudad umpisa subong nga adlaw tubtub Miyerkules, Oktubre 22, samtang padayon nga ginamonitor sang mga otoridad ang kondisyon sang panahon kag lebel sang tubig sa mga suba kag kanal.
Panawagan sang mga lokal nga opisyal sa publiko nga maghalong, likawan ang pagtabok sa ginabahaan nga dalan, kag gilayon nga magbakwit kon kinahanglanon.
Padayon naman nga ginapanagtag ang mga relief goods sa mga evacuation centers, samtang naka-alerto naman ang mga otoridad para sa search and rescue operations pananglitan nga maglala pa ang sitwasyon.
Samtang, ang mga lugar naman nga nag-suspend sang klase subong nga adlaw amo ang masunod;
*Roxas City – public and private schools (ALL LEVELS) tubtob October 22
*Pontevedra – ALL LEVELS
*Panitan – ALL LEVELS ; May work suspension subong man nga adlaw
*Panay – ALL LEVELS
*Ivisan – ALL LEVELS, tubtob bwas nga adlaw
*Sigma – Public and Private schools, ALL LEVELS
