Nagdangat na sa 68,875 ang kabug-usan nga numero sang napatay sa Gaza halin sang nagluntad ang inaway sa tunga sang Israel kag Hamas, suno sa lokal nga otoridad.
Kadungan sini, nagalab-ot naman sa 170,679 ang numero sang mga pilason.
Sa pinakaulihi nga datos, tatlo ka patay kag duha ka pilason ang gindala sa ospital sa sulod sang 24-oras, rason nga nagdangat sa 241 ang napatay kag 609 ang pilason halin sang ginpatuman ang ceasefire sang Oktubre 10 subong nga tuig.
Magluwas diri, 513-man ka mga bangkay ang narekober gikan sa narumpag nga mga building humalin sang nag-epekto ang ceasefire.
Suno sa mga otoridad, 15 ka dugang nga bangkay sang mga Palestinian ang ginbalik sang Israel sa bulig sang Red Cross, sa diin nakabalik ang Israel sang kabug-usan nga 285 ka mga bangkay humalin sang ginpatuman ang ceasefire. Sa nasambit nga numero, 84 pa lang ang na-identify sang medical teams.
