Nakabaton sang tig-₱5,000 nga initial nga ayuda ang tanan nga pamilya nga naapektuhan sang sunog sa Barangay Cagay, Sitio Bliss, Roxas City, halin sa Roxas City Government.
Sa interview sang Bombo Radyo kay Mr. Melvin Galagate, Head sang Roxas City Communications Group, iya ginpahayag nga sa pagpamuno ni Mayor Ronnie Dadivas, kaupod ang iya asawa nga si Mrs.Joanne Dadivas, ginpatigayon ang paghatag sang bulig sa mga pamilya nga naapektuhan sang sunog.
Samtang, naghatag man sang assistance ang Department of Social Welfare and Development ukon DSWD paagi sa paghatag sang mga kits para sa mga apektado sang sunog.
May bulig man nga ginhatag si Senator Bong Go para sa mga pamilya nga naapektuhan sang insidente.
Pahayag pa niya Galagate nga wala ginapabay-an sang Roxas City Government ang mga residente nga naga-atubang sang amo sini nga klase sang trahedya kag padayon ang paghatag sang bulig sa mga nasunugan.
Dugang pa sang natungdan, ginpatigayon sang DSWD kag City Social Welfare and Development Office ukon CSWDO ang assessment sa kahimtangan sang mga apektado sang sunog, sa koordinasyon sa barangay.
Sa karon, ang mga apektado sang sunog temporaryo nga nagapabilin sa ila mga paryente, samtang ang iban yara sa evacuation center sa Barangay Cagay.
Dugang pa niya nga ginaproseso pa ang housing assistance para sa mga apektado kag gina-evaluate pa ini sang CSWDO.
