ROXAS CITY, CAPIZ- Preparado na ang mga opisyales, tanod kag iban pa nga mga pwersa sang Barangay Banica, Roxas City para sa pagbantay sa palibot sang Banica Catholic Cemetery sa tion sang tigkalalag subong nga tuig.
Sa interview sang Bombo Radyo kay Punong Barangay Mike Xander Agrasada, sang nasambit nga barangay, iya ginpahayag nga nagpatigayon na sila sang coordination meeting natuhoy sa nasambit nga pagsug-alaw.
Suno kay Agrasada, nakighinun-anon na sila kaupod ang mga katapo sang Bureau of Fire Protection, PNP, Emergency Response Team kag iban pa nga ahensya para sa pagmentinar sang kalinong kag katawhay sang palibot pag-abot sang amo nga adlaw.
Pahayag nya, magalibot man ang mga tanod sang barangay sa sementeryo agud nga matsekyar ang sitwasyon ilabi na ang mga kabataan nga nagapanguha sang kandila samtang nagasiga pa ini.
Nagapanawagan naman ang natungdan sa tanan nga magapadulong sa amo nga patyo, nga mangin responsible sa mga basura kag magpabilin nga aligmat sa tagsa ka mga pagkabutang nga dala agud malikawan nga madulaan.
Interviewed by Bombo Francis Biñas
