ROXAS CITY – Nagapadayon ang pagmonitor sang mga katapo sang Business Permit and Licensing Office (BPLO) sang LGU-Sigma sa mga negosyante sa ila banwa.
Sa interview sang Bombo Radyo kay Mayor Dante Eslabon, ginpahayag sini nga kadungan sang iya mandu sa BPLO nga kinahanglan legal ang pagnegosyo sang mga Sigmahanon, madamo sang mga ginpangsarado nga mga establisiyemento kag negosyo bangud wala sang permiso.
Apang sa karon, gamay nalang ang mga negosyante nga wala makaproseso sang ila permit.
Apisar nga nakabaton sang negatibo nga komento si Eslabon natuhoy sa iya nga mandu, wala ini nag-untat sa pagpatuman bangud para sa iya, pabor ini sa mga negosyante nga marekognisar ang ila negosyo bilang legal, kag posible nga makakuha sang ayudad sa tion sang kalamidad.
Sa pihak nga bahin, may lima na ka pumuluyo nga naga-istar sa pangpang sang suba ang boluntaryo nga nag-demolish sang ila balay, kag nakabaton sang gamay nga bulig nagikan sa ila LGU.
Aminado ang alkalde nga may nagapakatig-a sa gihapon nga indi magbiya sa ila lugar, apang pahayag ni Eslabon nga pagkatapos sang tatlo ka mga notices kag indi gid magbiya ang mga apektado nga residente, wala ini sang mahimo kundi magpasaka sang kaso.
Matandaan nga ginmando ni Eslabon, nga kinahanglan nga magbiya sang mga residente nga may pamalay sa kilid sang suba bangud tuman ka delikado para sa ila kabuhi ang pagtenir sa nasambit nga lugar.
