Isa ka 75-anyos nga lolo nagikan sa Dagohoy, Bohol ang nagpukaw sang atensyon sang publiko matapos sini nga madinalag-on nga madalagan ang 25 kilometros sa marathon gamit ang daan kag gubaon nga sapatos.
Kilala bilang isa ka boxing trainer kag amay sang lima ka kabataan kag madugay na nga huyog ni Quirubin Amaga Abella, ang pagpasakop sa mga marathon sa pihak sang iya nga edad.
Suno sa report, nakatapos sang half-marathon sa sulod sang duha ka oras sadtong Oktubre 5 si Lolo Quirubin. Natandog naman ang mga netizens kag ang kapareho nga runners sa dedikasyon ni Lolo Quirubin sa pagdalagan sa pihak nga halos magisi na ang iya running shoes. Bangud sini madamo ang nagpahayag nga luyag nila nga hatagan sang bag-o nga sapatos nga pangdalagan si lolo.
Apang suno kay Lolo Quirubin, paborito niya nga suksukon ang iya nga gubaon nga sapatos. Daku nga bagay suno sa iya ang mga buho sini kun nagaulan bangud madali nga makaguwa ang tubig kun siya ang nagadalagan.
Tuman naman ang pagpasalamat ni Lolo Quirubin sa tanan nga mga nagregalo sa iya sang sapatos. Luyag niya ini nga ipakigbahin sa mga kabataan nga runners nga iya ginahanas. Bangud sini, ilabi pa siya nga gindayaw sang kadam-an bilang inspirasyon sa pagiging mabakod kag maalwan.
Nakatalana liwat nga magpasakop sa isa ka 24-kilometer run si Lolo Quirubin sa Nobyembre 3 kag ginalauman nga mas madamo pa ang magasubaybay sa iya nga kabuhi kag sa subong man sa iya nga pagdalagan.
