ROXAS CITY – Indi mapahamtang kag tuman ang kahadlok nga nabatyagan sang pila ka mga Overseas Filipino Workers (OFW) nga yara sa pungsod Israel, bangud sa padayon nga pagsigabong kag pagtupa sang mga rockets sa nagkalain-lain nga mga lugar.
Sa interview sang Bombo Radyo kay Bombo International Correspondent Philip Delos Santos Caragos caregiver sa Tel Aviv, Israel kag tumandok sang Ilaya, Ivisan Capiz, ginpahayag sini nga halos indi sila makatulog sang instakto bangud sa nerbyos sa tion nga maghuni ang sirena.
Sa 12 ka tuig nga pagtrabaho ni Caragos sa nasambit nga pungsod, ginpahayag sini nga ini na ang makabig niya nga makahaladlok nga iya na-eksperyensyahan.
Mahibaluan nga nagsugod ang kinagamo alas 5:30 sang aga kahapon kung sa diin masobra 300 nga mga Palestine ang nakasulod sa nasambit nga pungsod kag masobra 250 na ang napatay mapa-civilian man ukon suldado.
Ginpahayag man sini nga ginhatagan sila sang warning nga sa tion magtunog ang sirena buot silingon kinahanglan nila nga magpanago sa bomb shelter para sa ila kaluwasan.
Angut sini masobra 6,000 tubtob 7,000 nga mga racket ang ginahaboy sa Israel.
Sa karun, protektado man sila sang mga suldado sang Israel apang indi lamang suno diri magpakampante kag magpabilin sa gihapon nga maghalong sa tanan nga oras.
Ba-se sa pahayag sang mga Israeli may posibilidad nga magadugay pa ang nasambit nga kinagamo sa tunga sang Israel kag Palestine.
Panugyan sang gobyerno sang Israel nga indi maguha sa ila tagsa ka mga puluy-an ukon mga apartment kag indi man basta-basta nga magbukas sang pirtahan sa tion nga may nagapanawag kag masami nga tsekyaron ang mga cellphone agud mahibaluan kung sa diin nga lugar ang may yara sang bomba pinaagi sa red alert.
