THAILAND – Liwat nga nakabatyag sang pagkahangawa ang mga Overseas Filipino Workers ukon OFW’s sa Thailand kasunod sang isa ka insedente na naman sang pagpangluthang sa shopping mall sa Bangkok, Thailand kun sa diin isa ka babaye ang patay samtang isa naman ang padayon nga ginabulong sa ospital.
Suno sa report ni Bombo International Correspondent Cleo Rose Jondonero, lima ka-tuig nga nagatrabaho sa Thailand bilang manunudlo, natabo ang pagpangluthang sa atubang sang isa ka cosmetic clinic sa sulod sang Century The Movie Plaza sa Phaya Thai Road malapit sa Victory Monument kag tourist shopping area nga Sol Rangnam sa nasambit nga pungsod.
Base sa inisyal nga imbestigasyon sang mga otoridad sa Thailand, ginluthang patay sang suspek nga si Danusorn Numcharoen ang anay sini nga asawa nga si Piyanut Chatthai 28-anyos samtang nagatrabaho sa isa ka cosmetic clinic.
Magluwas diri, pilason man ang 29-anyos nga kaupdanan sini sa trabaho nga si Wilasinee Teepan nga ginluthang man sang amo nga suspek kag padayon karon nga ginabulong sa ospital.
Sa karon, yara na sa kustodiya sang mga otoridad ang nasambit nga suspek.
