Ginpahayag sang Land Transportation and Franchising Regulatory Board ukon LTFRB nga indi gilayon pagmultahan ang mga operator nga nag-upod sa tigil-pasada nga ginpatigayon sang transport group nga MANIBELA.
Suno kay LTFRB Acting Chairman Greg Pua Jr., kinahanglan anay mapamatud-an nga naglapas ang isa ka operator sa mga kondisyon sang iya prangkisa kag hatagan ini sang kahigayunan nga makapaathag antes magpatuman sang bisan ano nga penalidad.
Ginpahayag ini ni Pua matapos mismo nga magkadto sa hublag-protesta sang MANIBELA sa Philcoa, Quezon City, kun sa diin ginkompronta ni MANIBELA Chairman Mar Valbuena ang mga personnel sang LTFRB nga ginasuspetsahan nga nagakuha sang litrato sang plaka sang mga jeepney nga nag-upod sa protesta.
Suno kay Pua, ginpadala lamang ang mga personnel sang ahensya agud magmonitor kun may mga pasahero nga ma-stranded kag gilayon makapag-deploy sang libre nga sakay kun kinahanglan.
Nagpangayo man sang pasaylo ang opisyal sa natabo nga komprontasyon kag ginpaathag nga indi katuyuan sang mga personnel sang LTFRB nga kuhaan sang litrato ang mga plaka agud maghatag sang multa.
Ginpanginwala man ni Pua nga awtomatiko nga pagamultahan sang 5,000 pesos ang mga nag-upod sa tigil-pasada.
