ROXAS CITY – Nagareklamo karon ang mga mangingisda sa pila ka kabaranggayan sa siyudad sang Roxas bangud sang pigado nga hulik sang isda gikan sa ila nga floating fish cages sa kasubaan nga sakop sang Panay River.
Ang nasambit nga mga barangay ang ginalakipan sang mga Barangay Culasi, Libas, Dayao kag Cagay.
Base sa ginpalab-ot nga reklamo sang mga mangingisda, nabalaka sila bangud halos wala nagadako ang ila ginahupot nga isda.
May tion pa suno diri nga halos nagakalamatay ang mga isda sa ila nga fish cages.
Bangud diri, nagpalab-ot ang mga fish cage operators sang amo nga problema sa Barangay Fisheries and Aquatic Resources Management Council (BFARMC).
Ginpalab-ot man sang BFARMC ang amo nga problema sa Committee on Fisheries and Aquatic Resources Management Council (CFARMC) sang Roxas City council.
Magpatigayon man sang pagpangusisa ang CFARMC agud matul-id kun ano ang rason sang nagakahinabo nga fishkill.
