ROXAS CITY – Balik-normal na ang operasyon sang mga commercial establishments kag pila ka mga opisina sa Hong Kong kasunod sang temporaryo nga pagpaiway sini bangud sa coronavirus disease (COVID-19).
Ini ang ginpahayag ni Bombo International Correspondent Analyn Caminoy Villarias, tubong Sigma, Capiz kag isa ka Overseas Filipino Worker (OFW) sa nasambit nga pungsod sa iya report sa Bombo Radyo Roxas.
Suno kay Villarias, sang nakaligad pa nga adlaw sang Lunes nagbalik sa ila tagsa ka operasyon ang pila ka mga opisina kag establisyemento matapos ang halos isa ka bulan nga pagpatuman sang ‘work from home’ bangud sa peligro nga dala sang amo nga balatian.
Apang nagapabilin sa gihapon nga kanselado ang klase sa tanan nga lebel sa mga eskwelahan sa nasambit nga pungsod nga magadugay pa tubtob sa Abril.
Nagbalik naman suno diri sa normal ang suplay sang mga nagapanguna nga balaklon apang nagapabilin sa gihapon ang mahal nga presyo sang face mask kag iban pa nga hygiene products kapareho sang alcohol kag sanitizers.
