ROXAS CITY – Ginpasiguro ni Punong Barangay Anita Bitoon sang Brgy. Tanque nga padayon ang ila ginahimo nga mga aksyon agud matapna ang mga iligal nga buluhaton sa ila nga barangay.
Ini matapos ang pila ka serye sang pagpangawat nga natabo sa nasambit nga lugar.
Pahayag pa ni PB Bitoon, bangud sa natabo nga mga insidente sang kinawatay, mas ginpasangkad pa nila ang seguridad sa ila lugar subong man ang padayon nga operasyon kun sa diin may yara sang walo (8) tanan ka mga Barangay Tanod ang naga-duty kag gina-deploy agud magpatrolya kada gab-i.
Dugang pa sini nga wala sila nagapabaya nga mga barangay officials para madakpan ang mga kawatan.
Panugyan ni PB Bitoon sa iya mga nasakupan nga indi magduha-duha nga makig-angut sa ila ilabi na kun may mga makaduluda nga hulag nga nagakatabo agud gilayon nga mahatagan sang aksyon subong man mag-aligmat sa palibot ilabi na sa kagab-ihon.
Panawagan pa sini sa mga pumuluyo nga nabiktima sang pagpangawat nga gilayon nga magpadulong sa ila nga Brgy. Hall agud magparekord kag para mahatagan sang nagakaigo nga aksyon.
