Nagpaidalom sa ceremonial drug testing ang mga opisyal sang Roxas City, department heads, kag mga miyembro sang City Peace and Order Council (CPOC) kag City Anti-Drug Abuse Council (CADAC) bilang kabahin sang pagsaulog sang International Day Against Drug Abuse and Illicit Trafficking kag paglunsar sang Drug-Free Workplace Ordinance.
Suno sa local government, boluntaryo nga nagsumiter sang ila kaugalingon sa drug testing ang mga opisyal agud ipakita ang ila seryoso nga pagsuporta kag pag-upod sa kampanya kontra sa ilegal nga droga.
Nagresulta nga negatibo sa drug test ang tanan nga nagpartisipar sa aktibidad, nga ginakabig nga isa ka positibo nga tikang sa pagpakita sang ehemplo sa publiko.
Ginpahayag sang mga opisyal nga dapat magsugod ang kampanya sa sulod mismo sang City Hall paagi sa pagsiguro nga mangin isa ini ka Drug-Free Workplace.
Pinaagi sini, ginapaabot nga maprotektahan ang kaayuhan sang mga empleyado kag mapabakod ang integridad kag propesyonalismo sa serbisyo publiko.
Ginpasalamatan man ang Sangguniang Panlungsod bangud sa pagpasar sang ordinansa nga naga-institutionalize sang Drug-Free Workplace Program sa Roxas City Government.
Suno sa local government, kon luyag sang gobyerno nga suportahan sang katawhan ang isa ka drug-free workplace kag drug-free Roxas City, kinahanglan nga ang mga lider mismo ang mangin ehemplo sa pagsunod kag pagsuporta sa sini nga kampanya.
