ROXAS CITY – Personal nga nagpadulong sa estasyon sang Bombo Radyo ang isa ka mister agud ireklamo ang ila mga barangay officials sa Barangay Canapian, Maayon, Capiz matapos nga ginaalegar ila ginbakal sang motor BPAT-patrol ang calamity fund sang barangay.
Suno kay Eduardo Manazares nga may yara sang P53, 000 nga pondo ang ila nga barangay agud ibakal kuntani sang relief goods kag ipanghatag sa mga pumuluyo nga naapektuhan sang paglaslas sang bagyo nga Ursula.
Apang suno kay Manazares nga P10, 000 lamang ang gingasto sang barangay sa pagbakal sang relief goods.
Ini bangud ang nabilin nga P43, 000 nga pondo ang ila nga gin-down sa pagbakal sang motorsiklo bilang patrol sang ila BPAT.
Luyag maklaruhan ni Manazares kun bala mahimo nga magamit sang mga opisyales ang amo nga pondo sa iban nga butang sa baylo nga gamiton ini para sa pagbakal sang relief goods para sa mga pumuluyo.
Suno pa diri nga kapin sa 80 ka mga residente lamang ang nakabaton sang relief goods sa ila barangay apang nagalab-ot sa masobra 400 ang naapektuhan nga mga pumuluyo sang nasambit nga bagyo.
Bukas naman ang Bombo Radyo sa mga ginareklamo agud magpaathag sang ila nga bahin.
