Nagpatigayon sang pagsinapol ang mga opisyales sang Barangay Punta Tabuc kag Barangay 9 sa Roxas City, kaupod ang City Anti-Drug Abuse Council, agud mapalig-on pa ang kampanya batok sa iligal nga droga.
Sa interview sang Bombo Radyo kay Punong Barangay Nestor Buenviaje sang Punta Tabuc, iya ginpahayag nga ginhinilaan nila ang mga tikang kag programa para mapabakod ang kampanya batok sa iligal nga droga.
Suno kay Buenviaje, magapatuman sila sang nagkalain-lain nga programa agud mapasangkad pa ang kampanya batok sa iligal nga paggamit sang droga, ilabi na sa ila barangay.
Gintalakay man sa pagsinapol ang pagpanghanda para sa Drug Abuse Prevention and Control Week, agud madugangan pa ang ihibalo sang publiko kaangut sa malain nga epekto sang iligal nga droga.
