ROXAS CITY – Nagahimo na sang tikang ang mga opisyales sang Barangay Lucero, Jamindan Capiz, may kaangtanan sa asud-asud nga pagkinawatay sa ila nga lugar.
Sa interview sang Bombo Radyo kay Barangay Kagawad Nemesia Silvestre, ginpahayag sini nga pila sa mga tikang nga ila karun ginahimo amu ang pagpatuman sang curfew sa gab-i ilabi na sa mga menor de edad kun sa diin ginadumilian nga maguha pag-abot sang 9:00 sang gab-i, ikaduha amu ang pagpatrolya sang mga Barangay Tanod sa lugar ilabi na sa mga masami nga ginapadulungan kag posible gina-agyan sang kawatan.
Mahibaluan nga naghatag sang pagkabalaka kag kahadlok sa mga residente sa lugar ang natabo nga pagpangsulod sang mga isganan nga kawatan sa pila ka mga puluy-an sa ila barangay.
Suno kay Nemesia, nga sa sulod sang isa ka semana lima ka balay ang ginpangsaka sang kawatan kag duha diri ang natigayon nga makawatan sang ila mga pagkabutang kag kwarta.
Bangud sini, nagpahanumdum ang opisyal sa mga pumuluyo nga mangin alerto kag aligmat sa palibot, kinahanglan man nga tsekyaron ang mga bintana kag pwertahan sa tion nga magbiya sa balay ukon magkatulog.
Mas maayo man suno diri nga pahamtangan sang suga ang madulom nga parte sang balay agud madasig nga makita ang tawo nga magapadulong.
