ROXAS CITY – Nagakaubusan na sang mask sa mga balaligyaan sa Singapore, matapos naglab-ot na sa apat ang kumpirmado nga corona virus patient nga karon ginpaidalum sa quarantine sa isa ka ospital sa nasambit nga pungsod.
Sa report sa Bombo Radyo Roxas ni Bombo International Correspondent Alma Avelino, tumandok sang Roxas City kag 13 ka tuig na nga nagatrabaho sa Singapore bilang migrant worker, ginpahayag sini nga wala na sang mabakal nga mask sa mga drugstore, bangud humalin nga naglapta ang balita, nag-unahan na sa pagbakal ang mga tawo.
Nagpanic buying man sa pila ka mga lugar sa Singapore, sa kahadluk nga madulaan sang supply sang nagapanguna nga balaklon sa sulod sang balay.
Mangin sa mga ospital wala man ginapahanugutan nga may makaguha nga mask bangud ginahatagan prayoridad ang mga pasyente sang ospital.
Nagpaguwa man sang advisory ang Singaporean government sa publiko nga magsuksok sang face mask kun magguha sa balay labi na kun crowded area ang padulungan.
Nagpanawagan man ang gobyerno sa mga indibidwal nga gikan sa China nga nakabatyag sang flu like symptoms nga magpaidalum sa corona virus test para sa kaugalingon nga proteksyon kag indi makalaton sa iban.
Samtang sa pihak sang kahadluk nga nabatyagan sang mga tawo sa Singapore, padayon sa gihapon ang selebrasyon sang Chinese New Year.
