Natalana nga magapatigayon sang lockdown drill ang mga pampubliko nga eskwelahan sa Capiz sa sini nga bulan sang Hulyo agud masiguro nga handa ang mga estudyante kag manunudlo sa tion sang emerhensiya.
Sa interview sang Bombo Radyo kay Glenda Marie Botin, Project Development Officer II sang Disaster Risk Reduction and Management (DRRM) sang Department of Education (DepEd) Capiz, iya ginpahayag nga ginatudluan ang mga estudyante kag personnel sang husto nga dapat himuon sa tion sang drill.
Suno kay Botin, kon ianunsyo ang lockdown drill, kinahanglan magpabilin nga kalmado ang tanan kag gilayon magkadto sa pinakamalapit nga safe nga lugar ukon classroom.
Ginpahayag man sini nga kinahanglang nga magsunod sa instruksyon sang manunudlo ukon coordinator kag magpalayo sa mga bintana kag pwerta, kag indi magguwa tubtob indi pa clear ang lugar.
